LAOAG CITY – Indatag ni Vice Mayor Rey Carlos Fariñas ti 2025 Accomplishment Report ti Sangguniang Panlungsod ditoy siudad ti Laoag.
Segun kenkuana, daytoy ket tapno makita dagiti padana nga agpanpanday linteg iti konseho dagiti naggapoananda idi tawen 2025.
Inbatadna a ti legislative output ti 12th Sangguniang Panlungsod manipud idi Enero agingga iti Hunio 2025 ket adda ti naipasa a 74 a resolution, 17 nga ordinance ken 4 nga appropriation ordinance.
Inlawlawagna nga iti met 13th Sangguniang Panlungsod manipud idi Hulio agingga iti Disiembre 2025 ket adda ti naipasa nga 62 a resolution, 20 nga ordinance ken 3 nga appropriation ordinance.
Mainaig iti daytoy, inpakaammo ni Vice Mayor Fariñas a ti 12th Sangguniang Panlungsod manipud idi Enero agingga iti Hunio 24, 2025 ket nakaisayangkat ti 25 a regular session idinto nga iti 13th Sangguniang Panlungsod manipud idi Hunio 30 agingga iti Disiembre 23, 2025 ket nakaiyuswat ti 26 a regular session.
Kabayatanna, indanon ti Bise Mayor ti napalaos a panagyamanna kadagiti kakaduana iti konseho gapu ta uray naggapuda iti nagduduma a political parties ket nagkaykaysa dagitoy a nangaprobar kadagiti nasao a gakat.
