LAOAG CITY – Naarestar ti dua a lallaki iti Anti-Illegal Drug Buy-bust Operation iti Barangay Bobon iti ili ti Burgos.
Nabigbig dagiti suspek nga isuda Jowie Ancheta, agtawen ti 45, awanan asawa, awanan trabaho ken residente ti Barangay Bobon iti ili ti Burgos ken George Nolasco, agtawen ti 45, naasawaan, residente ti Barangay Davila iti ili ti Pasuquin.
Balligi a natiliw dagiti nasao a suspek babaen iti nagtitipon a puersa ti Burgos Municipal Police Station kas lead unit, RID, PDEA-RO1, PDEU, PIU ken PDEA-R01.
Nakumpiskar manipud kadagiti dua a suspek ti uppat nga heat-sealed transparent plastic sachet a naglaon ti maipagarup a shabu nga agdagsen ti sumurok-kumurang maysa a gramo, maysa a ribu a pisos a nausar kas buy-bust money ken dadduma pay a drug paraphernalia.
Naimatangan dagiti pannakabagi ti media ken dagiti opisial ti barangay iti naiwayat nga Anti-Illegal Drug Buy-bust Operation.
Iti agdama, nagtalinaed iti pagbaludan dagiti suspek kabayatan a maisagsagana ti kaso a maipila kontra kadakuada.
