LAOAG CITY – Inlawlawag ni Senate President Tito Sotto III nga addaan ti bileg ti Senate Blue Ribbon Committee a mangpaayab ti panagdengngeg mainaig kadagiti alegasion ti anomalya iti flood control projects uray pay adda iti congressional recess wenno bakasion ti Kongreso.
Daytoy ket mainaig iti rakurak ni Blue Ribbon Committee Chairman Ping Lacson nga ituloy inton Enero 19 ti panagdengngeg mainaig kadagiti rumrummuar a ghost flood control projects.
Inbatadna nga adda ti karebbengan dagiti Senador a mangidadaulo kadagiti komite a mangiwayat ti panagdengngeg uray iti baet ti congressional break.
Kunana nga adda ti motu proprio powers ti Blue Ribbon Committee tapno mangpaayab ti panagdengngeg wenno mangiwayat ti imbestigasion.
Naammoan nga inton Lunes a manamnama a talantanen iti panagtultuloy ti panagdengngeg ti Senado iti maibagbaga a panangibabawi iti testimonia dagiti sumagmamano a dati nga opisial ti Department of Public Works and Highways (DPWH) nga immuna a nangibutaktak ti maipagarup a panangomisyon dagiti sumagmamano a Senador ken pulitiko kadagiti maanomalya a flood control projects.
Naminsan manen a paay-ayaban ti Senado da dati a Department of Public Works and Highways Secretary Manuel Bonoan, dati a Department of Education Undersecretary Trygive Olaivar ken ni dati a Cong. Zaldy Co no sadinno a no saanda nga agatendar ket mabalin nga ipaarestar isuda ti Senado.
