LAOAG CITY – Nagballigi dagiti otoridad a nangtiliw iti nagsina nga operasyon ti dua a babai a maibilang a wanted person ditoy probinsya.
Immuna a naarestar babaen ti bileg ti warrant of arrest ti agtawen ti 59, awanan ti trabaho, taga Brgy Sta Asuncion iti ili ti San Nicolas ngem agnanaeden idiay Brgy. Bahet, San Ildefonso iti Ilocos Sur.
Naarestar ti akusado gapu iti kaso na nga estafa ken narekomendaran ti 40 a ribo a pisos a piyansa na para iti temporaryo a pannakawaya-waya na.
Kabayatanna, naarestar met babaen iti bileg ti warrant of arrest ti agtawen ti 68, balo, Overseas Filipino Worker ken residente iti Barangay Nagbacalan iti ili ti Paoay gapu iti kaso na a panaglabsing ti Migrant Workers and Overseas Filipino Act of 1995.
Awan ti nairekomendar a pagpiyansa ti akusado para iti temporaryo a pannakawaya-waya na.
Iti agdama, nagtalinaed dagiti akusado iti Philippine National Police.
