LAOAG CITY – Pursigido ni Sen. Joseph Victor “JV” Ejercito a tumulong iti Ilocos Norte a nangipaay kenkuana ti naan-anay a suporta iti panawen a kinasapulanna ti tulong.
Segun kenkuana, awan ti aniamanna no adda man dagiti makagura gapu ta mamati nga arigna saanna nga inannong ti pagrebbenganna no adda dagiti Mayor iti nagdumaduma a Local Government Units wenno Medical Director nga agpatulong nga awan man laeng ti aramidenna.
Inpaayna nga ehemplo ti pannakakitana iti panagkasapulan a mapatarimaan ti pasilidad ti Mariano Marcos Memorial Hospital and Medical Center wenno adda ti proyekto wenno programa a nakitana a dakkel a tulong kadagiti umili a nakiddaw ti itutulongna a mangipaay ti pundo.
Inkalinteganna a paset iti trabahoda kas Senador ti panangipaayda ti congressional intervention.
Mainaig iti daytoy, inpettengna nga awan ti makitana a pagdaksan no mangaramid ti addang tapno makatulong.
Innayonna nga itultuloyna ti tumulong ditoy Ilocos Norte babaen iti panangkiddawna ti tulong ti Senado para iti pannakapasayaat ti serbisio dagiti lokal a gobierno ditoy probinsia ken kangrunaanna iti benneg ti salun-at.
