LAOAG CITY – Kinumpirmaran ti Department of Justice a pada a respondent ni Sen. Jinggoy Estrada iti ‘plunder case’ iti flood control ni dati a Department of Public Works and Highways Secretary Manuel Bonoan.
Segun ken ni Justice Spokesperson Atty. Polo Martinez, karaman ti nasao a dati a sekretaryo kadagiti pinilaan ti National Bureau of Investigation ti reklamo a plunder.
Kuna na a co-respondent ti senador ni dati a Public Works Sec. Bonoan iti maipagarop nga iregularidad kadagiti proyekto ti gobierno.
Inlawlawag met ni Justice Spokesperson Atty. Polo Martinez a saan laeng a maipanggep daytoy iti maymaysa a proyekto no di ket iti maibagbaga a tinakaw a kinabaknang nga agbalor ti nasurok a 50-milyon a pisos.
Innayon na a kombinasyon daytoy iti sumagmamano ken dagiti napagtitipon a transaksyon nga adda ti pakainaigan ti flood control projects anomaly.
Iti agdama ket awan pay ti naikeddeng nga skedyul wenno petsa no kaanu a marugyan ti preliminary investigation mainaig iti plunder case.
Inrakurak ni Martinez a daytoy ket ipabus-oy iti panel of prosecutor a mangiggem iti kaso a mangisyu met ti subpoena.
