LAOAG CITY – Posible nga adda idiay Cambodia wenno Thailand ti wanted a negosiante a ni Charlie Atong Ang.
Basar iti Department of the Interior and Local Government (DILG) a daytoy ket basar iti naalada nga impormasion manipud iti whistleblower a ni Julie Patidongan.
Inbatad ni Department of the Interior and Local Government Secretary Jonvic Remulla nga adda ti kabaelan ni Ang nga agbiahe idiay Cambodia iti babaen ti panagdalyasatna iti backdoor tapno liklikan dagiti otoridad.
Naammoan nga adda ti maipagarup nga online sabong operation ni Ang idiay Cambodia isut gapuna a sigurado nga adun ti am-ammona nga opisial iti nasao a pagilian pakairamanan ti Thailand.
Mainaig iti daytoy, apaman a makumpirmaran nga adda idiay Cambodia wenno Thailand ni Ang ket idanonda ti impormasion ken ni Presidente Ferdinand Marcos Jr. tapno agdesision isuna no ania ti sumaruno nga addang.
Immunan nga inrakurak ti Presidente a prioridad daytoy ti kaso dagiti mapukpukaw a mammallot no sadinno a ti maitudtudo a mastermind ket ni Ang.
