LAOAG CITY – Inlawlawag ni Senior Fire Officer 1 Mark Bryan Lagutan, ti chief operation iti Bureau of Fire Protection iti ili ti Sarrat ti nagbalin a duktal da iti pannakauram ti maysa a motorsiklo a nagluganan ti dua nga indibidual iti Barangay 6 iti nasao nga ili.
Inbatad ni Lagutan a basar iti akinkukua ti motorsiklo ket aggapo da iti trabaho da iti Barangay Bacsil iti ili ti Paoay, ken gapu ta traffic iti agkurba a paset ti Brgy. 6 iti ili ti Sarrat ket nagiddep ti nagluganan da.
Kuna na nga idi pinagandar ti driver ti motorsiklo ket isu metten ti panagapoy ti makina na isut gapuna a bimmaba da a dagus iti lubbon na.
Naamoan a dagiti nakalugan ti motorsiklo ket agawid da koma iti Barangay Capurictan iti ili ti Solsona idi napasamak ti insidente.
Inpakaammo ni Lagutan a basar pay iti driver ket sakbay a nagawid da manipod iti pagtrabahoan da ket saan nga agandar ti motorsiklo isut gapuna nga inikkat da ti spark plug cup na ken indirekta da ti waya iti spark plug isut gapuna nga open daytoyen ken agtedted ti carburador na.
Innayon ni Lagutan a naminpinsan a nauram ti motorsiklo pakairamanan ti original nga OR-CR ken tools na nga adda iti tool box.
Mapatta-patta nga umabot iti 25 ribo a pisos ti balor dagiti nadadael iti pannakauram ti nasao a motorsiklo.
Kabayatanna, inbalakad ni Lagutan a sakbay nga agbiyahe ket siguradwen nga awan ti problema ti lugan ken no agtedted ti carburador ti motorsiklo ket masapol a sukatan a dagus tapno maliklikan ti aniaman nga insidente.
