LAOAG CITY – Mamati ni Mr. Dominador “Babot” Arzadon iti Barangay Darat iti ili ti Pinili a saan a nagpakamatay ti kabsat a ni Alejandre Arzadon no di ket pinatay da.
Segun kenkuana, nasayaat ti kabsatna ken saanna a maitured a kettelen ti bukod na biag gapu ta awan met ti ammo da a problema na.
Kunana a nakaugalian ti kabsatna ti mapan agluto wenno agiplastar iti karinderia na no aras iti alas-kwatro iti parbangon.
Innayon na nga awan ti ammo da a karirriri na isut gapuna a saan da pulos a ninamnama a mapasamak kenkuana daytoy, aglalo ket managtulong pay iti pada na a tao ti biktima.
Kabayatanna, inpetteng ni Mr. Dominado Arzadon a ti laeng tartarigagayan da ket maipaayan ti hustisya ti pannakapapatay ti kabsat na.
Immuna iti daytoy, inpakaammo ni P/Maj. Antonio Marzan, Hepe ti Pinili Municipal Police Station a maysa a lakay a nabigbig a ni Alejandre Arzadon ti maipagarup a pinapatay ken natakawan iti Barangay Darat iti ili ti Pinili.
Segun ken ni P/Maj. Marzan, basar iti manugang ti biktima a ni Jerryson Saludez, masansan nga iti oras ti alas tres wenno alas kuatro ti parbangon ket isu ti panagturturong ti biktima iti karinderya na tapno agisagana ken agiplastar kadagiti lutwenna.
Nupay kasta, iti oras ti alas sais ti bigat ket nakigtot ti manugang ti biktima kalpasan a nakitana a nakatali iti tengnged ti katugangan na ken naigalot daytoy iti handle ti freezer.
Mainaig iti daytoy, kuna ni P/Maj. Marzan a maibasar iti medical examination ni Dr. Agnes Barlahan, ti Rural Health Officer iti ili ti Pinili a natay ti biktima gapu iti maipagarup a panagpakamatay ken awan ti foul play a napasamak, ngem iti biang ti nailian a pulisya ket saanda nga iwalin ti posibilidad nga adda ti sabali a nangaramid iti daytoy, rason nga agpanpanawagan iti pamilia ni Anzadon a makikoordinar kadakuada tapno maipadalan ti otopsiya ti bangkay.
