LAOAG CITY – Makikoordinar ti gobierno ti Pilipinas kadagiti otoridad idiy Sweden para iti pannakaarestar ni dati nga Ako Partylist Rep. Zaldy Co iti bileg ti warrant of arrest kontra kenkuana gapu iti maipagarop a pannakairaman na iti maanomalya a flood control projects,.
Daytoy ti inbatad ni Department of the Interior and Local Government Secretary Jonvic Remulla.
Inpakaammo ni Remulla nga agturong a mismo idiay Sweden tapno personal a makisarita kadagiti otoridad iti nadakamat a pagilian, ken inpasigurado na nga iti sumaruno a dua a lawas ket ipakaammo na no ania dagiti mapasamak.
Inpakaammo pay ni Remulla a plano dagiti otoridad ti Pilipinas nga ikabil iti “red flag” ti foreign passport ni Co.
Inpetteng ni Remulla nga adda ti iggem a foreign passport ni Co isut gapu na a nawaya a makagaraw tapno mapan iti nagduduma a pagilian.
Maipalagip nga idi Disyembre 2025 ket nakanselar ti Philippine passport ni Co ngem adda pay ti iggem na a Portuguese passport.
Immuna iti daytoy, nakumpirmaran nga adda ni Co idiay Stockholm, Sweden idi Enero 15 , maibasar iti apostille a naipan iti petisyon nga inpila na iti Korte Suprema.
Ti apostille ket sertipikasyon a mangipaneknek ti naggapwan ti public document.
