LAOAG CITY – Manarimaanen ti pannakikoordinar ti Pilipinas iti counterpart-da idiay Cambodia tapno matiliw ditoy ti negosiante a ni Charlie “Atong” Ang gapu iti pammati nga aglemlemmeng daytoy iti nasao a pagilian.
Inbatad ni Department of the Interior and Local Government Secretary Jonvic Remulla, ti Pilipinas ket addaan ti extradition treaty idiay Cambodia isu a mapaalisto ti pannakaisubli ditoy Pilipinas ni Ang no daytoy ket mapaneknekan nga aglemlemmeng idiay Cambodia.
Nupay kasta, inbatad ni Remulla nga uray adu ti koneksion ken adu ti kuarta ni Ang ket aramidenda ti amin a wagas tapno maarestar daytoy.
Kunana nga uray awan ti extradition treaty ti Pilipinas idiay Timor Leste ket naisubli ditoy Pilipinas ni dati a Negros Rep. Arnie Teves gapu iti pannakikoordinarda kadagiti otoridad iti nasao a pagilian.
Immuna nga atapen nga aglemlemmeng ni Ang idiay Cambodia wenno Thailand basar iti rakurak ti whistleblower a ni Julie Patidongan.
Inlawlawag ni Remulla nga addan ti agarup 18 a lugar ditoy Pilipinas ti na-raid ti pulisia iti panangbiruk ken ni Ang.
Maipalagip nga adda ti naidiya a 10 a milyon a pisos kas gunggona iti asinoman a makaipaay wenno makaitudo iti pannakaarestar ni Ang.
Immuna iti daytoy, adda ti naiparuk-at a warrant of arrest kontra ken ni Ang gapu iti pannakapukaw dagiti mammallot.
