LAOAG CITY – Lukatan manen ti House Committee on Ethics ti kaso kontra iti suspendido a mangibagi ti Cavite a ni Rep. Francisco “Kiko” Barzaga intono Pebrero 3, 2026.
Daytoy ket basar ken ni Committee Chairman JC Abalos.
Inbatad ni Abalos a personal a napanda inted ken inawat ti opisina ni Barzaga ti abiso mainaig iti panagdengngeg, ken namnamaen da ti panagatendar ken naan-anay a pannakitinnulong ti ubing a kongresista iti pannakatratar manen ti kaso.
Ti panaglukat manen ti kaso ket kas panangsurot iti mosyon nga inaprubaran ti plenary ti kamara de representantes nga inpila ni Deputy Majority Leader ken 1Rider Party-list Rep. Ramon Rodrigo Gutierrez kalpasan ti privilege speech ni Manila Rep. Rolando Valeriano.
Inpasingked ni Abalos a naiget ti pannakaisayangkat ti panagdengngeg kas maiyataday kadagiti pagannurutan iti kamara de representantes ken respetaren ti karbengan ni Barzaga iti due process.
