LAOAG CITY – Ibilang itan ti Iran kas kadagiti terorista a grupo dagiti pagilian a miembro ti European Union (EU) a nangikabil iti Islamic Revolutionary Guard Corps (IRGC) iti listaan dagiti terorista nga organisasion basar ken ni Iranian Parliament Speaker Mohammad Baqer Qalibaf.
Nagmarka idi Huebes ti European Union ti maysa a naisangsangayan a panagbalbaliw iti pagannurotan daytoy kontra iti Iran kalpasan nga indeklararna a terorista nga organisasion ti Islamic Revolutionary Guard Corps kagiddan ti nadara a crackdown ti Islamic Republic kontra kadagiti tignay protesta sipod idi naestablisar ti pagilian idi 1979.
Inbatad ni Qalibaf, maiyataday iti Article 7 ti linteg ti Iran kontra iti panangideklarar iti Revolutionary Guards kas terorista a grupo, ibilang metten dagiti terorista nga organisasion dagiti pagilian iti Europa.
Inlawlawagna a talantanen ti parliamentary commission on national security ti posible a panangpatalaw kadagiti military attaché ti European Union iti Iran ken makikoordinar iti Ministry of Foreign Affairs.
Naammoan a ti Islamic Revolutionary Guard Corps ket naestablisar kalpasan ti 1979 Islamic Revolution tapno ilaban ti sistema nga idadauluan dagiti Shi’ite clerics.
Iti agdama, dakkel ti impluwensia ti Islamic Revolutionary Guard Corps iti Iran gapu ta kontrolado daytoy ti dakkel a paset ti ekonomia.
