LAOAG CITY – Maiyur-uray ti sungbat ti Department of Economy, Planning, and Development (DEPDev) kadagiti inaplikaran ti probinsia a mapagbalin nga economic zone.
Segun ken ni Gov. Cecilia Araneta Marcos a naisubmitiren ti Ilocos Norte Trade and Investment Promotions Office dagiti kasapulan a papeles para iti panagbalin nga economic zone ti dati a Northern Foods Corporation wenno NFC, Dap-ayan Commercial Complex ken ti Takuat Training Center.
Mamati ti gobernador nga iti agdama ket “approved in principle” ti nasao nga aplikasion ti gobierno probinsial.
Maipalagip nga adda dagiti inspeksion nga isagsaganan ti gobierno probinsial iti panagbalin ti Takuat Training Center nga Economic Zone kalpasan a pinadalusan ti gobernador ti nadakamat a lugar.
Nupay kasta, inbatadna a daytoy ket paset iti kalikagumna kas ina ti probinsia a mapagbalin a nadalus ken naurnos dagiti nagdumaduma a pasilidad nga adda iti babaen ti gobierno probinsial.
Naammoan a malaksid iti pannakadalus ti Takuat ket naiyurnos pay dagiti nakapenpen iti nasao a pasilidad.
Inbatad ti gobernador a naipan iti maymaysa a lugar dagiti makmakan ken sabali a lugar kadagiti nagdumaduma a banbanag iti tulong dagiti kameng ti Philippine National Police.
Kunana a kas paset iti pannakidanggay ti nailian a pulisia iti maika-208 nga anibersario ti Ilocos Norte ket nagmula dagitoy ti 208 a niyog iti sakup ti Takuat.
Innayon ni Gov. Marcos nga inawagan ti Philippine National Police ti insayangkatda nga aktibidad nga “agcecillepo” a naadaw iti nagan ti gobernador ti naurnos a pannakaisayangkat dagiti aktibidad iti Takuat Training Center.
