LAOAG CITY – Inpakaammo ni Dr. Rodrigo Catcatan, mangidadaulo ti City Health Office ditoy siudad ti Laoag nga addan dagiti nagaplikar a doktor para iti Rural Health Unit 2 ken 3.
Segun kenkuana, adda dagiti lima a nagaplikar ngem tallo laeng dagiti na-interview ken kasapulan a dua laeng iti maala manipud kadagitoy.
Inbatadna a no makastrekton dagiti dua a nagaplikar a doktor ket isudanto ti mapan iti Rural Health Unit 2 ken 3.
Mangnamnama ni Dr. Catcatan ti naan-anay a pannakadutok dagitoy tapno adda dagiti katulunganda a mangipaay ti serbisio medikal kadagiti umili ditoy siudad ti Laoag.
Immunan nga inrakurak ni Dr. Catcatan a dagiti kakaduana a dati a doktor ket nagretiron.
Kabayatanna, inpasingked ti City Health Officer nga agtultuloy latta ti panangipaayda ti serbisio medikal kadagiti umili nga agturturong iti opisinada.
