LAOAG CITY – Kinumpirmaran ni Ukrainian President Volodymyr Zelensky nga insingasing ti Estados Unidos a maaddaan ti alisto a solusion tapno malippasen ti gubat iti nagbaetan ti Ukraine ken Russia sakbay a madanon ti Hunio 2026.
Nupay kasta, agtultuloy ti panangatake ti Russia iti Ukraine’s energy infrastructure a nangitunda ti nalawa a blackout iti baet ti nalamiis a paniempo.
Inadmitir ni Zelensky nga iti maikadua a rikos ti United States brokered peace talks idiay Abu Dhabi, nagtalinaed a narigat dagiti sumagmamano nga isyu a sangsangoen ti dua a pagilian kas ti territorial concessions.
Tinalantan ti posibilidad ti trilateral meeting iti nagbaetan dagiti lider ngem kasapulan pay ti preparatory elements.
Basar iti datos ti Ukraine, ti baro a nalawa a drone ken missile strikes ti Russia ket adda ti 400 a drones ken 40 a missiles ti inusar a target ti energy grid, generation facilities ken distribution substations iti uppat a rehion iti pagilian.
Agtultuloy ti retaliatory strikes ti Ukraine kontra iti Russia pakairamanan ti panang-target iti missile fuel factory iti Tver region ken oil depot iti Saratov region idiay Russia.
Maipalagip a nabayagen nga ilunglungalong ni United States President Donald Trump ti panaglippas ti gubat.
