LAOAG CITY – Saan a manen a natuloy iti maikadua a gundaway ti promulgation iti kaso ti dati a Mayor iti ili ti Dingras a ni Marinette Gamboa.
Segun ken ni Atty. Joel Garcia, abugado ti dati a Mayor, daytoy ket kalpasan a nagtalinaed pay laeng iti ospital idiay Metro Manila ti klientena.
Inbatadna a kalikagum ti akusado nga agatendar iti korte ngem saan a palubosan ti doktor daytoy nga agbiahe gapu ta mabalin a mairisgo ti biagna.
Inlawlawagna a nakana ti sakit a sagsagabaen iti agdama ti akusado isut gapuna a kasapulanna pay laeng ti naan-anay a panagimbag nangruna ket nangato ti blood pressure-na.
Mainaig iti daytoy, inkiddaw ni Atty. Garcia nga iyetnag lattan ti desision ti korte mainaig iti kaso ni Gamboa iti baet a saan a makaatendar a “physically present” gapu iti situasionna.
Inpettengna a basar iti linteg ti criminal procedure ket maipalubos met latta a maiparuk-at ti desision ti korte uray saan a makaatendar ti akusado.
Nupay kasta, segun iti hues a gapu ta sumangsango ti nadagsen a kaso ti akusado kas ti murder ket masapul nga agatendar daytoy iti korte.
Naammoan a nagatendar iti promulgation ni Atty. Cocoy Ruiz, baro daydi napapatay a ni dati nga Ilocos Norte Electric Cooperative wenno INEC Board President Lorenzo Rey Ruiz.
Kabayatanna, naikeddeng inton Pebrero 20 ti sumaruno a promulgation iti kaso kontra ken ni Gamboa.
Maipalagip a sumangsango ni Gamboa iti kaso a murder gapu ta maitudtudo isuna a mastermind wenno akin-utek iti pannakapapatay ni Ruiz idi 2009.
Nagpiyansa ti 400 a ribu a pisos ni Gamboa para iti temporario a pannakawaya-wayana idi Disiembre 2023.
Immuna iti daytoy, natiliw ni Gamboa idiay Calamba, Laguna babaen kadagiti kameng ti National Capital Region Police Office (NCRPO) babaen iti bileg ti warrant of arrest nga inparuk-at ni Judge Felix Salvador gapu iti kasona a murder.
