LAOAG CITY – Kinomendaran ti Sang Panlungsod ti gobierno lokal ditoy ciudad ti Laoag ti kinadalos iti sentro ditoy ciudad kalpasan dagiti dadakkel a programa ken aktibidad kas paset ti Pamulinawen Festival 2026.
Segun ken ni Konsehal John Michael Fariñas, ti chairman ti Committee on Environment, saanna a ninamnama nga iti baet nga ado dagiti tattao a napan nagbuya ket alisto a nadalusan ti sentro ditoy ciudad kalpasan dagiti nasao nga aktibidad wenno programa.
Mangnamnama ti konsehal nga agtalinaed ti kinadalos iti aglawlaw agingga a malpas ti panagfiesta ditoy ciudad ti Laoag.
Mainaig iti daytoy, kinablaawan ti konsehal ti executive branch nga idadaulwan ni Mayor James Bryan Alcid gapu ta napagtalinaed ti kinadalos iti sentro ditoy ciudad kabayatan ti Pamulinawen Festival.
Kabayatanna, inpanakkel met ni SK Federated President Michael Agustin a malaksid kadagiti street sweepers ket katulungan pay ti city government dagiti scholars tapno agdalos iti aglawlaw aglalo iti sentro ditoy ciudad.
