LAOAG CITY – Naikeddeng a mangiparuk-at ti Department of Health (DOH) ti maysa a memorandum circular tapno mairaman iti zero balance billing (ZBB) dagiti direct contributor ti Philippine Health Insurance Corp. (PhilHealth).
Mangipaay daytoy ti wagas para kadagiti mangmangged a direkta nga agbaybayad ti contribution nga ik-ikkaten iti sueldoda tapno maka-avail ti ward wenno shared room kadagiti amin a 87 nga ospital nga ipatpataray ti Department of Health a libre iti babaen ti zero balance billing policy.
Iti maysa nga statement, inrakurak ti Department of Health nga inaramid ti baro a pagannurotan kas sungbat iti pammilin ni Presidente Ferdinand Marcos Jr. a mangibilbilin a siguradoen mabenepisiaran ti middle-class earners dagiti benepisio manipud iti gobierno.
Inbatad ni Health Secretary Teodoro Herbosa, naruay ti agar-arungaing para kadagiti ad-adda pay a pinapintas a benepisio para kadagiti direct contributors ti PhilHealth ken dagitioy ket dagiti makiskissayan ti premium contribution-da manipud iti sueldoda.
