LAOAG CITY – Balligi ti pannakainanugar baro nga slaughterhouse ditoy ciudad ti Laoag iti panangidaulo ni Mayor James Bryan Alcid.
Karaman dagiti nagatendar iti pormalen a panaglukat ti baro nga slaughterhouse ket dagiti sumamamano a kameng ti konseho ditoy cuidad kas kada Konsehal Bjorn Lao ken konsehal Jaybee Baquiran.
Iti panagbitla ni mayor Alcid, inbatad na a ti nasao nga slaughterhouse ket maysa kadagiti kadakkelan nga slaughter house iti intero a rehion uno.
Maragsakan gapu ta alisto a nalpas ti proyekto a pagpartian kadagiti dingwen dagiti umili ditoy cuidad.
Kunana a babaen iti daytoy ket nataltalged dagiti karne a maparti a mailako iti tiendaan .
Inlawlawag na pay nga iti pannakaipalawa ti slaughter house ket kabaelan na nga akomodaren iti 100 agingga iti 200 a bilang dagiti dingwen a maparti.
Maipalagip a kalikagom ni Alcid a mapagbalin a “double A” ti category ti slaughterhouse ditoy ciudad ti Laoag.
