LAOAG CITY – Addan ti makitkita ni Presidente Ferdinand Marcos Jr. nga agbalin a pambato para iti 2028 Presidential Elections.
Daytoy ti inrakurak ti Presidente kalpasan a nasaludsod isuna iti ASEAN Editors and Economic Opinion Leaders Forum a naisayangkat iti Fairmont Hotel idiay Makati City.
Sungbat ni Marcos, ti rumbeng a sumaruno a lider ti pagilian ket adda ti ammona maipapan iti ekonomia tapno maaddaan ti naruay a trabaho, no kasano a maipababa ti inflation ken no kasano a maipasigurado nga umdas ti suplay ti taraon.
Inpaganetgetna a nasken pay nga agpanpanunot maipanggep iti productivity, kabaelanna ti panangpasayaat ti edukasion, panangpapigsa ti healthcare ken mangsupsuporta iti pagannurotan a makatulong iti biag dagiti Filipino.
Kuna ti Presidente a narigat nga ikabil iti presidential level ti awan ti padasna iti pulitika gapu ta saan daytoy nga am-ammo dagiti tattao isu a ti kitaenda ket dagiti adda iti gobierno nga agtrabtrabaho, nalaing ken maibaga nga exceptional.
Inpetteng ti Presidente nga addan dagiti tattao nga ikonkonsiderarna ti potensial a sumukat kenkuana ngem nagkedked daytoy nga inaganan ken saan pay laeng a mangiyendorso iti agdama.
