LAOAG CITY – Inpasigurdo ti Malakanyang a saan a madanagan ni Pres. Ferdinand Marcos Jr. iti adu a bilang dagiti senador a kadua ni Vice President Sara Duterte iti Senado mainaig iti impeachment trial daytoy.
Inbatad ni Palace Press officer Atty. Claire Castro nga uray pay numero ti maysa kadagiti pagballigian ti proseso, saan a panpanunoten ti Palasyo nga agbalin a narigat ti panagtaray ti impeachment trial gapu ta ad-adu ti kaalyado ti Bise Presidente.
Inpetteng ni Castro, addan iti desision kadagiti Senador ken no aniaman ti aramidenda iti impeachment trial, dagiti umili ti agbantay kadakuada.
Kunana a ti publiko ti mangibaga no patas ken no nainkalintegan ti trabaho dagiti senador iti impeachment trial base kadagiti ebidensia.
Innayonna a nasken nga adda iti puso dagiti senator judge no kasano a suroten ti linteg, no kasano nga ipatungpal dagiti pagannurotan ken saan nga ipatungpal basar laeng ti tao a kanunonganda.
