LAOAG CITY – Inpetteng ti kampo ni dati a Presidente Rodrigo Duterte a biktima laeng isuna iti sensationalism manipud iti media ti Pilipinas, kagiddan ti maikatlo nga aldaw a confirmation of charges hearing iti International Criminal Court (ICC).
Binabalaw ni Atty. Nicholas Kaufman, lead defense counsel ni Duterte, ti nagbalin a wagas ti panagipadamag dagiti kameng ti media iti pagilian.
Segun iti abogado, nagtutuuk ti kliyente na gapu ta maipagarop a nakaugalian ti Philippine media a mangtututuk laeng kadagiti salacious elements wenno dagiti kontrobersyal ken makapakigtot a paset dagiti nagbalin a panagbitla dagiti indibidual.
Inlawlawag ni Kaufman a ti kastoy a klase ti panagipadamag ket saan a mangipakita iti kompleto a konteksto dagiti nairakurak ti dati a presidente, nga isu ti naaramat kontra kenkuana.
