LAOAG CITY – Awan ti biang iti panagtaray ni Vice President Sara Duterte iti 2028 presidential elections dagiti agpanpanday linteg ti Kamara de Representantes gapu iti ‘laser-focus’ dagitoy iti impeachment complaint kontra kenkuana a mangrugi ti deliberasion inton Lunes, Marso 2.
Ti rakurak ni AKO Bicol Partylist Rep. Terry Ridon ket kalpasan nga inbatad dagiti miembro ti National Unity Party (NUP) nga ipatungpalda ti conscience vote iti impeachment ken saanda nga agbutos no awan ti maiprisentar a baro a nadagsen nga ebidensia kontra ken ni Duterte iti impeachment.
Ni Vice President Duterte ket matingiting iti uppat a beripikado nga impeachment complaint a pakairamanan ti culpable violation of the Constitution, betrayal of public trust, graft and corruption, bribery ken dadduma pay nga high crimes.
Maipalagip nga inton bigat ket rugianen a tingitingen ti Justice panel ti ‘sufficiency in form and substance’ iti uppat nga impeachment sakbay a naan-anay a mailungalong ti deliberasion ken pagbubutosan daytoy.
