LAOAG CITY – Natay ti dua nga indibidual ken naruay a dadduma pay ti nasugatan iti napasamak a pammaltog iti ruar ti maysa a bar idiay Austin, Texas.
Ibilang ti Federal Bureau of Investigation ti insidente nga adda ti pakainaiganna iti terorismo.
Nabigbig ti suspek a ni Ndiaga Diagne, agtawen ti 53 a maysa a naturalized American citizen a naipasngay idiay Senegal.
Basar kadagiti otoridad, kalpasan ti panagrespondeda ti tawag nga adda ti pammaltog iti asideg ti Buffords bar ket napaltoganda ken napapatay ti suspek.
Naitaray iti ospital ti 14 a tattao a nasugatan iti insidente.
Agtultuloy nga am-ammoen dagiti otoridad ti motibo ti suspek iti insidente no sadinno a nakasuot daytoy ti bado nga adda ti nakasurat a “Property of Allah.”
