LAOAG CITY – Nagballaag ni Senate President Vicente ‘Tito’ Sotto III a mabalin nga addaan ti “loopholes” ti gakat nga Anti-Political Dynasty Bill partikular iti kaso ti extramarital partners ken dagiti kabagianda.
Sinaludsodna no sakupen ti linteg dagiti karelasion ti agdama nga opisial a saan a kasar kadakuada.
Sinungbatan ni Sen Risa Hontiveros, Chairman ti Committee on Electoral Reforms, a wen ken ipaimada iti Commission on Elections (COMELEC) no maipatpatungpal ti kastoy a klase ti relasion.
Inbatadna a mabalin a ma-void ti certificate of candidacy no rummuar nga addaan ti political dynasty connection ken mabalin pay a mangipasa ti quo warranto petition no maduktalan daytoy kalpasan ti eleksion.
Sakupen ti gakat ti political dynasties agingga iti maikadua a degree ti consanguinity ken affinity pakairamanan ti asawa, nagannak, anak, kabsat, lolo, lola ken apoko.
Dinakamat ni Sotto a sakupen ti gakat ti kabsat, nagannak wenno anak ti karelasion ti opisial a mabalin a mangitunda ti pannakaiyakar ti impluwensia.
Inpaganetget ni Sotto ti kasapulan a solusion kadagiti nasao a kaso ken kuna ni Hontiveros nga adalenda pay daytoy tapno masigurado ti bileg ti gakat.
