LAOAG CITY – Naiget ti panangbantay ti Estados Unidos iti sitwasyon ti Strait of Hormuz, maysa kadagiti napateg a pagdalanan t maikonkonektar iti oil-rich Persian Gulf iti open sea, kabayatan a kumarkaro ti tensyon iti rehiyon no sadinno a pinaigetan ti Iran dagiti pangta kontra kadagiti barko a dumaldalan iti daytoy.
Segun ken ni White House Press Secretary Karoline Leavitt, naiget a banbantaya ti U.S. Department of Defense ken Department of Energy ti sitwasyon iti nasao a pagdalann kasta met ti regular a panangipaay ti briefing ken ni U.S. President Donald Trump.
Inbatad ni Leavitt a mabalin a mangipatulod ti Amerika ti U.S. Navy tapno agbalin nga escort dagiti oil tanker a dumalyasat iti nasao a waterway.
Nupay kasta, inlawlawag na nga awan ti agdama a plano ti panangipatulod ti U.S. ground troops iti Iran.
Innayon pay ti White House, a saan pay a naan-anay nga inserra ni Trump ti aniaman nga opsyon a panangipatulod ti militar gapu ta nakadepende iti agbalin a taray ti sitwasyon.
Maipalagip nga iti napalabas a lawas ket maipagarop nga
adda dagiti oil tanker shipment ti nakangngeg ti radio broadcast a maipagarop a naggapo iti Iranian navy a mangipawpawil kadakuada a dumalyasat iti Strait.
Kinumpirmaran met ti Iranβs Revolutionary Guards nga iggem da ti sibubukel a control iti Strait of Hormuz.
Ti Strait of Hormuz ket maysa kadagiti kapatgan a ruta ti langis iti intero a lubong.
Masarakan daytoy iti nagbaetan ti Oman ken Iran, ken agserserbi a pagnaan manipod iti Persian Gulf agturong iti Gulf of Oman ken Arabian Sea.
Iti kaakikidan a paset daytoy, ket addaan laeng ti kaakaba a sumuruk-kumurang a 33 a kilometro idinto a ti mismo a shipping lane ket agarop 3 a kilometro laeng ti kada direksyon.
Mapatta-patta nga agarop 1/5 ti pakabuklan a konsumo ti langis iti lubong ti magmagna iti Strait of Hormuz.
Basar iti datos, nasurok a 20 a milyon barrels ti crude oil ken dadduma pay a fuel ti dumaldalyasat iti lugar iti kada aldaw.
