LAOAG CITY – Ngimmato iti P18.13 trilyon ti utang ti Pilipinas idi Enero 2026 kalpasan nga i-frontload ti administrasion ti panangiyisyu ti utang tapno makaala ti nababbaba nga interes basar iti Bureau of the Treasury (BTr).
Basar iti datos ti Bureau of the Treasury, nangatngato ti 2.41% maidasig iti P17.707 trilyon idi Disiembre ken 11.16% a nangatngato maidasig iti P16.312 trilyon idi Enero 2025.
Iti pakabuklan nga utang, adda ti P12.324 trilyon wenno 68% ti domestic debt.
Rumrummuar a nangatngato daytoy ti 1.72% manipud iti P12.116 trilyon iti napalabas a bulan ken 11.19% maidasig iti kapada a bulan iti napalabas a tawen.
Kuna ti Bureau of the Treasury a naaddaan ti net incurrence a P208.05 bilyon iti government securities gapu iti napaigetan a namnama iti lokal a pangal-alaan ti pundo.
Umabot met iti P0.47 bilyon ti balor ti foreign currency-denominated domestic securities.
