LAOAG CITY – Nagbaliktad ti 22-wheeler truck a nagkarga ti naruay a softdrinks iti Barangay Balaoi iti ili ti Pagudpud.
Nabigbig ti dua a driver nga isuda Godfrey Baisa ken ti agtawen ti 30, naasawaan ken residente ti Barangay Libertad, Abulog, Cagayan idinto a ti kaduada pay ket ni Maenard Respondo, awanan asawa, agtawen ti 21 ken residente ti Poblacion 2, Luna Apayao.
Segun ken ni P/Cpt. BJay Calivoso, Hepe ti Pagudpud Municipal Police Station, kabayatan a dumaldalyasat ti truck nga agturong nga agpa-amianan iti kurbaan a paset nga agpasalug iti barangay road ti Barangay Balaoi ket kellaat a napukawan ti preno isut gapuna a napukawan ti kontrol ti manibela a nangitunda ti pannakabaliktadna iti tengnga ti kalsada.
Gapu iti daytoy, nagsagaba ti sugat iti nagduduma a paset ti bagi dagiti nakalugan iti 22-wheeler truck.
Naitaray dagiti biktima iti Rural Health Unit iti ili ti Pagudpud ngem naiyakar iti Bangui District Hospital para iti naan-anay a pannakatamingda babaen kadagiti nagresponde a kameng ti Philippine National Police, Bureau of Fire Protection, Municipal Disaster Risk Reduction and Management Office ken Rural Health Unit.
Iti agdama, manarimaan pay laeng ti imbestigasion dagiti otoridad mainaig iti balor ti pannakadadael ti lugan ken perdision dagiti nabuong a bote ti softdrinks.
