LAOAG CITY – Nagbinnara manen iti plenary ti senado da Senador Panfilo Lacson ken Senador Rodante Marcoleta kalpasan a dinillaw ni Marcoleta ti kaawan ti opisyal a committee report agpapan kadagitoy a gundaway.
Daytoy ket kalpasan ti serye ti panagdengngeg ti Senate Blue Ribbon Committee mainaig kadagiti maanomalya kadagiti flood control project iti pagilian.
Segun ken ni Lacson, naikkanen ti inisyal a report ti tunggal senador no sadinno nga addaan dagitoyen ti kopya nga addaan ti watermark ti bukod da nga opisina.
Inlawlawag ni Lacson nga inaramid daytoy ti opisina na tapno maliklikan ti napasamak a panagleak iti inisyal a report ti komite iti napalabas.
Bwineltaan met ni Marcoleta ti rakurak ni Lacson no sadinno nga inpetteng na nga adda ti sumagmamano a kurang ti report ti komite, aglalo ti kaawan ti napapateg a nagan kas ni Adrian Bersamin, a dati a nagserbi kas Undersecretary ken Presidente ti Presidential Legislative Liaison Office (PLLO).
Inukir pay ni Sen. Marcoleta ti maipagarop a panangipilpilit dagiti pada da a senador kas ken ni Sen. Panfilo Lacson a daytoy ket pro-China.
Iti panagsinnungbat manen da Lacson ken Marcoleta iti plenary ti Senado, inpalgak ni Marcoleta nga agpaawag ti hearing intono Marso 12 mainaig iti isyu ti West Philippine Sea ken ti pagpatinggaan ti teritoryo ti Pilipinas iti pagriririan a kabaybayan.
Karaman kadagiti naimbitaran ket dagiti mangibagi ti National Mapping and Resource Information Authority (NAMRIA) Philippine Coast Guard, Philippine Navy, ken dagiti dadakkel a personalidad kas kada dati a Justice Antonio Carpio ken dadduma pay.
Iti panangsaludsud ni Lacson ken ni Senate Committee on Foreign Relations Chair Erwin Tulfo, insungbat ni Tulfo a saan a makaatendar dagiti naimbitaran nga ahensiya ken dagiti personalidad.
Gapu iti daytoy, inpetteng ni Lacson a kumkumpirmaren ni Marcoleta ti maysa a banag a saan met pay a nakumpirmaran.
