LAOAG CITY – Kalikagum ti Provincial Government of Ilocos Norte a maipabaro ti Letter of Agreement iti PDRRM Council ken Civil Aviation Authority of the Philippines.
Segun ken ni Mr. Marcel Tabije, mangidadaulo ti Provincial Disaster Risk Reduction and Management Office a gagem daytoy a mapatibker ti panagtitimpuyog dagiti kameng ti Laoag International Airport Emergency Response Organization a bukbuklen dagiti nagdumaduma nga ahensia ti gobierno kas iti City Disaster Risk Reduction and Management Office, ospital, Ilocos Norte Police Provincial Office, Coastguard, Bureau of Fire Protection, Philippine Air Force ken dadduma pay.
Inbatadna a babaen iti pannakaipabaro ti katulagan, no adda emerhensia wenno saan a mapakpakadaan a pasamak iti erupuerto ket sindadaan amin dagiti miembro a tumulong.
Inlawlawagna a kalpasan a naaprobaran ti resolusion iti konseho ket adda ti maaramid a resolusion iti Sangguniang Panlalawigan ken kalpasanna ket agpirman ni Gov. Cecilia Araneta Marcos iti katulagan.
Innayonna a napateg daytoy tapno maipaayan ti aerodrome certification ti Laoag International Airport a mangipamatmat a masursurot dagiti “safety standard” iti operasyon ti erupuerto.
