LAOAG CITY – Kasapulanen a mangipakita ti National ID dagiti benepisiario ti Indigent Senior Citizens program (SocPen) sakbay a makaawat ti Social Pension payout mangrugi inton Abril ita a tawen.
Daytoy ket basar iti Department of Social Welfare and Development (DSWD) ket kas paset ti ad-adda pay a pinalawa nga addang ti gobierno nga aramiden a kangrunaan nga ID ti National ID kadagiti amin a transaksion ditoy pagilian.
Iti babaen ti Expanded Senior Citizens Act of 2010, mangipapaay ti Department of Social Welfare and Development ti P1,000 a binulan nga ayuda kadagiti senior citizen nga agtawen ti 60 agpangato partikular kadagiti masakit, addaan ti rangkap ti bagi ken nakapsot ti bagina.
Iti napalabas a tawen, sumurok 4.1 a milyon a senior citizen ti nakaawat ti social pension iti babaen ti Senior Citizens program.
Inlawlawag ti Department of Social Welfare and Development a ti programa ket saan a para iti amin a senior citizen no diket daytoy ket nairanta para laeng kadagiti benepisiario nga awan ti maaw-awatna a pension manipud kadagiti ahensia ti gobierno kas ti Social Security System, Government Service Insurance System, Philippine Veterans Affairs Office, awan ti regular a trabaho ken saan nga agig-igem ti aniaman a posision a nabutosan wenno dinutokan iti barangay ken kasapulan nga isuda ket nakarehistro iti community-based monitoring system (CBMS).
Basar iti Department of Social Welfare and Development, mangipatakderda ti Philippine Identification System registration iti mismo nga aldaw ti payout isut gapuna a mabalin nga agparehistro dagiti senior nga awan pay ti National ID-na.
Agtultuloy ti Philippine Statistics Authority iti panangawat kadagiti aplikasion para iti National ID iti sumurok 200 a registration sites iti intero a pagilian.
