LAOAG CITY – Adda ti color coding ti amin a nainstolar a fire hydrants ditoy siudad ti Laoag.
Segun ken ni Vice Mayor Rey Carlos Fariñas, adda ti naisayangkat a taripnong kaduada ti Bureau of Fire Protection ditoy siudad ti Laoag maipanggep iti pannaka-instolar kadagiti fire hydrants.
Inbatadna nga amin dagitoy ket agop-operar ken napigsa ti iruarna a danum a dakkel a makatulong no adda ti mapasamak nga emerhensia.
Kunana a napintas ti pannaka-instolar dagiti fire hydrants kadagiti nagduduma a lugar ditoy siudad ti Laoag.
Innayonna a babaen iti daytoy ket as-asideg a pagalaan ti danum dagiti residente kangrunaanna kadagiti kameng ti Bureau of Fire Protection no adda ti uram iti maysa a lugar.
