LAOAG CITY – Nagpanawagan ni Senador Francis “Kiko” Pangilinan ti nalawlawa nga interbensyon manipod iti gobierno tapno maprotehiran dagiti mannalon ken mangngalap kontra iti kumarkaro nga epekto ti panagngato ti presyo ti langis gapu iti krisis iti Middle East.
Inpetteng ni Pangilinan a ti panagngato ti global oil prices ket direkta a mangidurduron ti panagngato iti gastos iti transportasyon, abono, ken dadduma pay a napapateg nga agricultural inputs nga ad-adda a mangparigat iti babassit a mannalon ken mangngalap.
Kuna na a maikabil iti risgo ti food security ti pagilian no agtultuloy nga agbalin a limitado ti suporta kadagiti nasao a sektor.
Segun ken ni Pangilinan, saan nga umdas dagiti agdama nga addang ken masapol a mangidasar ti Department of Agriculture (DA) ti nalawag ken komprehensibo a plano tapno masigurado nga agtultuloy ken umdas ti produksyon ti taraon.
Inlungalong na pay ti panagusar ti dadduma a pondo kas ti quick response fund ti Department of Agriculture ken uray ti calamity fund no kasapulan tapno manayunan ti ayuda iti nasao a sektor.
Immunan nga inlungalong ni Pangilinan ti pannakaipalawa ti fuel subsidies para kadagiti mannalon ken mangngalap,kasta met ti temporary a pannakasuspenso ti fuel excise tax tapno maalay-ayan ti epekto ti panagngato ti presyo ti langis.
Kagiddan iti daytoy, ilunglungalong na pay dagiti reporma kas ti pannakapapigsa ti agricultural cooperatives, pannakaisubli ti agricultural extension services iti babaen ti gobierno ken panangbukel ti maysa a komisyon a mangtutuk iti agrikultura, panagkalap ken food security.
Iti baet ti kumarkaro a krisis, inpetteng ni Pangilinan a kasapulan ti dagus a pannakatratar daytoy tapno saan a maikabil iti alanganin ti suplay ti taraon iti pagilian.
