LAOAG CITY – Nauram ti maysa a pagtaengan iti Barangay 1, San Lorenzo ditoy siudad ti Laoag.
Segun ken ni Barangay Chairman Manny Morales iti nasao a barangay, nabigbig ti akinkukua ti nauram a pagtaengan a ni Mr. Federico Aquino Jr.
Inbatadna nga apaman a nakadanonda iti lugar ket dakkelen ti apoy ken alisto a nagramram daytoy gapu ta naaramid laeng ti light materials ken daanen ti pagtaengan.
Inlawlawagna a basar iti inisyal nga imbestigasion, rumrummuar nga iti maikadua a kadsaaran ti pagtaengan ti nagrugian ti uram no sadinno a ginandat pay a sebseban ti akinkukua ti balay ti apoy ngem idi nakitana a dumakdakkelen ti apoy ket insigida daytoyen a rimmuar.
Kunana nga adda pay ti karinderia nga adda iti baba ti pagtaengan.
Naammoan a maipagarup a gapu iti electric fan ti nangitunda iti napasamak nga uram.
Innayonna a malaksid iti Bureau of Fire Protection ditoy siudad ti Laoag ket napan pay nagresponde iti uram dagiti firetruck manipud iti ili ti San Nicolas ken Vintar pakairamanan ti firetruck ni Vice Mayor Rey Carlos Fariñas.
Kabayatanna, agtultuloy ti imbestigasion dagiti kameng ti Bureau of Fire Protection mainaig iti namunganayan ti uram.
