LAOAG CITY –Nauram ti dua a pagtaengan iti Barangay Población 2 iti ili ti Pagudpud.
Daytoy ket pakairamanan ti maysa nga on-going construction a pagtaengan ken maysa a naaramid ti lightweight materials kas iti nipa ken kayo nga arigna ket pagimbakan laeng ti ramit.
Segun ken ni F01 Resty Saguilla, ti Bureau of Fire Protection, a nagtawag dagiti akin kukua ti pagtaengan iti agarup alas-8 ti rabii ket insigida met ti panagresponde dagitoy.
Inlawlawagna a daytoy ket alisto a nagkayamkam gapu iti kinapigsa ti angin ken lightweight materials laeng ti nakaaramidan ti nasao a pagtaengan.
Gapu iti nakaro nga uram, ket awan ti naisalbar dagiti akin kukua a ramit ken addaan ti agarup P127,500 ti gatad dagiti nadadael.
Nupay kasta, kunana nga awan ti nadangran iti insidente ken sakbayda a nagresponde ket addan ti panagtitinnulong dagiti tattao para iti pannakasebseb iti apoy.
Inbatadna a nupay adda ti panagpukaw ti koryente ket insigida met laeng a nagsubli daytoy.
Innayonna a saanda a narigatan a nangsebseb ti uram gapu ta kompleto da iti ramit ken adda pay ti panagresponde ti Bureau of Fire Protection (BFP) Bangui.
Naideklarar ti agarup alas-8:35 ti fire-out kadagiti nasao a pagtaengan.
Iti agdama, kuna ni Saguilla manarimaan pay laeng ti imbestigasion ti puon ken gapu iti uram.
Kabayatanna, nagpalagip daytoy ti panagan-annad ken pannakapatalged kadagiti ramit tapno maliklikan ti aniaman nga uram.
