LAOAG CITY – Impakaammo ni Mayor James Bryan Alcid ti pannakaangay ti panagtataripnongda iti City Disaster Risk Reduction and Management Office, Philippine National Police, Bureau of Fire Protection ken ti Schools Division ti siudad ti Laoag para ti pannakaipatungpal ti peace and order kadagiti amin a pagadalan ditoy siudad.
Kunana nga adda ti report idi naglabas nga aldaw mainaig iti insidente ti pannakaiserrek ti armas kadagiti lugar a pampubliko no sadinno ket naiget a maipawil ti kastoy nga insidente kangrunaanna kadagiti pagadalan.
Ibatadna nga insigida a kinasaritana dagiti otoridad para iti pannakailawlawag ti insidente ken para iti naigiget a panagridam kadagiti karit ti seguridad ken kinatalna ti siudad ti Laoag.
Inpettengna a kitkitaenda dagiti mabalin pay nga aramidenda tapno masigurado ti kinatalged ti amin a lugar ditoy siudad.
Kabayatanna mainaig iti daytoy, immunan a nangibunong ti metal detectors ni Mayor James Bryan Alcid tapno makita ken ma-detect dagiti agiserserrek kadagiti makapatay a banag kas kadagiti kutsilyo wenno paltog kadagiti pagadalan ken pakairamanan kadagiti pampubliko a lugar ditoy siudad ti Laoag.
