LAOAG CITY – Mapatta-patta nga umabot iti sumurok 1.3 milyon a pasahero ti sumangpet manipud iti Ninoy Aquino International Airport (NAIA) ita a Semana Santa iti baet ti posible a panagngato ti plete gapu iti panagngina ti fuel surcharge.
Basar iti Manila International Airport Authority (MIAA), nangatngato ti bilang dagiti pasahero maidasig iti napalabas a tawen ken nangrugin ti panagdudupudop dagiti biahero sipud pay idi Sabado.
Inbatad ni Manila International Airport Authority General Manager Eric Ines nga adda ti sumagmamano a pasahero a maudi nga orasen a gimmatang ti tiket isut gapuna a saan pay a naan-anay a marikna ti epekto ti panagngato ti presio.
Manamnama nga ipangato iti Level 8 ti fuel surcharge manipud Abril 1 agingga iti 15 a mabalin nga umabot iti sumurok P6,000 para iti international flights ken posible a nangatngato pay.
Iti baet daytoy, inpasigurado ti Philippine Airlines ken Cebu Pacific nga umdas ti jet fuel supply-da para iti sumarano a tallo a bulan.
