LAOAG CITY – Naikeddeng a malpas ti misyon ti Artemis II ita nga aldaw Abril 10, 2026, oras iti Amerika no sadinno a namnamaen ti National Aeronautics and Space Administration (NASA) ti natalged nga splashdown ti spacecraft iti kabaybayan iti asideg idiay California.
Kalpasan ti sumurok siam nga aldaw iti tangatang, agsina ti Orion crew module nga ayan dagiti astronaut manipud iti service module sakbay daytoy a sumrek iti atmosphere ti Earth.
Ti service module ket naan-anay a mauram idinto a ti crew capsule ket agsubli a natalged.
Iti panagserrek manen iti atmosphere, makapasar dagiti astronaut ti nakaro a pudot ken puersa nga agarup uppat a daras ti normal a gravity.
Temporario a mapukaw ti komunikasion iti uneg ti sumurok-kumurang innem a minuto gapu iti plasma a mangbalbalkot iti lugan.
Aglukat dagiti parachute tapno pabayagen ti capsule sakbay daytoy nga agsuek iti baybay.
Insigida nga agresponde ti United States Navy tapno isalakan dagiti astronaut a manamnama nga ikabil iti medical bay iti uneg ti dua nga oras kalpasan ti splashdown.
Naiget nga imonmonitor ti National Aeronautics and Space Administration ti reentry gapu iti nagbalin nga isyu iti heat shield ti napalabas a misyon nga Artemis I.
Gapu iti daytoy, inurnos ti wagas ti panagsubli ti spacecraft tapno makissayan ti nakaro a pudot.
Iti baet nga adda ti nairekord a bassit a buttaw ti helium iti propulsion system, inbatad dagiti opisial a saan daytoy a nakaapektar iti pakabuklan a taray ti misyon.
Basar iti National Aeronautics and Space Administration, kumpiansada iti kinatalged ti sistema ken ti balligi a panagsubli ti Artemis 2 ket napateg nga addang para kadagiti sumaruno pay a misyon nga agturong iti bulan.
