LAOAG CITY – Inallukoy ni Senador Christopher “Bong” Go ti gobierno iti alisto a tignay tapno matulungan dagiti mannalon ken dagiti mangngalap nangruna ita nga agpangpangadua dagitoy iti panagtultuloy iti panagbiagda iti baet ti agtultuloy a panagngato iti presio ti langis.
Inpettengna nga uray malugi ti gobierno ket nasken a matulungan nga insigida dagiti mannalon ken dagiti mangngalap gapu iti pangta iti daytoy a problema ti panagbagsak ti produksion ken panagngato iti presio dagiti magatgatang.
Insingasingna nga usaren pay laeng ti “excess funds” ti gobierno tapno maalay-ayan ti epekto ti krisis iti pagbiagan dagiti Pilipino.
Pammalagip ti agpanpanday linteg a napateg ti kontribusion dagiti mannalon ken mangngalap iti food security ti pagilian ken nasken a solbaren ti gobierno ti kasapulanda uray malugi pay daytoy.
Naikeddeng a mangipasa ti gakat ni Go mainaig iti kumarkaro a krisis iti pagilian.
