LAOAG CITY – Nagballaag dagiti grupo ti mannalon iti possible a pannakalugi agingga iti P12-B iti sektor ti agrikultura, no ituloy ti gobierno ti nailungalong a naan-anay a pannakaikkat ti taripa kadagiti maang-angkat a mais.
Pormal a nagpila ti panangkontra ti Federation of Free Farmers (FFF) ken MAGSASAKA Party-list kontra iti nasao nga addang.
Segun ken ni Federation of Free Farmers Board Chairman Leonardo Montemayor, nupay ti gagem ti gakat ket maipababa ti presyo ti baboy ken manok iti baet ti krisis iti enerhiya, ti ad-adda a maapektaran ket ti panagbiag dagiti lokal nga agtaltalon ti mais.
Nagballaag ti grupo a no bumagsak ti farmgate price, possible a mapilitan ti kagudua dagiti mannalon nga isardeng ti agmula ti mais.
Inpetteng ni Montemayor a saan a nainkalintegan ti nasao nga addang gapu ta basar iti panagadal da, awan pay ti maysa a porsyento ti namnamaen a pagbabaan ti retail price dagiti karne.
Basar kadakuada, bassit unay ti epekto na kadagiti aggatang no ikompara iti binilyon a pisos a mapukaw dagiti lokal a mannalon.
Iti agdama a sistema, mapatpatawan ti lima agingga iti 15 a porsyento ti taripa ti amin a corn imports a sumsumrek iti pagilian.
Maibasar iti kaudian a datos, adda iti 60 a porsyento laeng ti pakabuklan a suplay ti mais iti pagilian ti aggapo iti lokal a produksyon, idinto a ti nabatbati ket maang-angkat iti sabali a pagilian.
