LAOAG CITY – Pormalen a nagsapata ni Davao City Mayor Sebastian “Baste” Duterte kas baro a Presidente ti Partido Demokratiko Pilipino (PDP) iti naisayangkat a National Council Meeting ti partido ita nga aldaw ti Domingo, Abril 12.
Segun kadagiti opisial, ti pannakadutokna ket mangisimsimbolo ti dakkel a panagbalbaliw iti panangidaulo ti partido idinto a pinatibkerna ti direksion pangpulitika ken istruktura ti organisasion kadagiti sumaruno a tawen.
Nagatendar iti nasao a panagtataripnong ti sumagmamano a kangrunaan a lider ti partido pakairamanan da Senador Christopher ”Bong” Go, Sen. Robin Padilla, 1st District Rep. Leandro Leviste, dati nga Executive Secretary Vic Rodriguez, dati a Press Secretary Trixie Cruz Angeles ken SAGIP party-list Rep. Paolo Marcoleta.
Iti nasao a taripnong, naminsan manen a pinatibker dagiti lider ti partido ti panagkaykaysada iti panagserbi iti publiko.
Inpeksa ti Partido Demokratiko Pilipino ti kumpiansada nga iti panangidaulo ni Duterte ket maitultuloy ti adbokasia ti inclusive development ken responsable a panangimaton para iti pagilian.
Maipalagip a ti posision ket dati nga iniggamanen ni Sen. Robin Padilla.
