LAOAG CITY – Nagballaag dagiti eksperto iti salun-at a nupay maysa ti manok iti kalatakan ken alisto a pangalaan ti protina, ti nalabes a panagkonsumo iti daytoy ket mabalin a mangitunda ti nagduduma a problema iti salun-at.
Basar kadagiti nutritionist, ti sobra a pannangan ti manok aglalo no daytoy ket prinito wenno addaan ti nangato a taba ket mabalin a mangpangato ti kolesterol iti bagi.
Daytoy ket possible nga agresulta iti panagbara dagiti urat ken panagngato ti risgo iti sakit iti puso.
Inlawlawag na pay ti sumagmamano a proseso iti produksyon ti manok, kas ti panagusar ti antibiotics iti panagtaraken ti manok ket mabalin a mangitunda ti antibiotic resistance kadagiti tattao a nalabes ti panagkonsumo na iti daytoy.
Daytoy ti agbalbalin a rason no apay a marigatan ti bagi a labanan ti sumagmamano a klase ti impeksiyon.
Innayon dagiti eksperto, a ti sobra a protina manipod iti manok ket mabalin a mangitunda ti dakes nga epekto kadagiti bato, aglalo kadagiti tattao nga addaan ti sakit iti kidney.
Saan met nga irekomendar dagiti eksperto ti masansan a pannangan ti processed chicken products kas ti hotdog, nuggets, ken longganisa gapu iti nangato nga asin ken preservatives a mabalin a mangpangato ti presyon ti dara.
Binalakadan dagiti eksperto ti publiko a pagtalinaeden ti balanse ken masustansya a diyeta.
