LAOAG CITY – Awan pay ti nagtestigo a nangipaay ti rakurak a mangikonkonektar ken ni dati a Senador Ramon “Bong” Revilla Jr. iti maipagarup a “ghost” flood control project idiay Pandi, Bulacan kalpasan ti maysa a lawas a nagtultuloy a panagdengngeg iti bail application iti Sandiganbayan Third Division.
Sipud nangrugi dagiti panagdengngeg idi Abril 6, siam a testigo ti inpasango ti Office of the Special Prosecutor (OSP) tapno lappedan ti aplikasion ni Revilla para iti piyansa ngem awan uray maysa kadakuada ti nakapaneknek ti aniaman a koneksion ti dati a senador iti nasao a proyekto.
Immuna a simmango iti prosekusion ni Atty. Ivan Samson, maysa nga imbestigador manipud iti National Bureau of Investigation (NBI) a nangidaulo iti panangimbestigar kadagiti maipagarup nga iregularidad mainaig iti flood control project.
Simmaruno a nagtestigo dagiti inhinyero manipud iti Department of Public Works and Highways (DPWH) Bulacan 1st District Engineering Office nga isuda Engr. Aldous Santos ken Engr. Kenneth Fernando tapno mangipaay kadagiti teknikal a detalye mainaig iti nasao proyekto.
Iti maysa a panagdengngeg, nangiparuk-at ti subpoena ti korte kontra iti sumagmamano nga opisial ti Department of Public Works and Highways tapno lawlawagan ti saan nga agkakatugma a rakurak mainaig iti lokasion ti proyekto.
Daytoy ket kalpasan nga intudo ni Engr. Fernando ti sabali a lugar maidasig iti immuna a dinakamat da Atty. Samson ken Engr. Santos nga agpada a nangiwayat ti inspeksion.
