LAOAG CITY – Inpasingked ni Ms. Shey Pia Abaya, ti mangidadaulo iti Public Employment Service Office ditoy ciudad ti Laoag a kada bulan ton nga adda iti maiyuswat a job fair ditoy ciudad.
Segun kenkuana, maysa daytoy kadagiti kalikagumda a tungpalen gapu ta makita da nga ado dagiti umili nga agkasapolan ti trabaho.
Kunana a maysa pay kadagiti mandato ni Presidente Ferdinand Marcos Jr. ket ti pannakaisayangkat ti ad-ado a job fair.
Inbatad ni Abaya a no ado dagiti maisayangkat a job fair ket dakdakkel met iti posibilidad a makasapol iti pagtrabahoan dagiti umili.
Kabayatanna, kunana a mabalin a bisitaen dagiti umili ti facebook page da gapu ta ditoy da nga agi-upload kadagiti programa wenno aktibidad iti opisina da a mabalin a gundawayan dagiti umili kangrunaan no adda dagiti job vacancies.
Innayon na a daytoy ket maysa laeng kadagiti bilin ni Mayor James Bryan Alcid nga alisto a mangipaay ti serbisio kadagiti agkasapolan.
