LAOAG CITY – Inrakurak ni United States President Donald Trump a maipagarup nga immannugot ti Iran a saan nga ituloy ti panangbitay iti walo a babbai a raliyista kalpasan a kiniddawna ken kas panangrespetar kenkuana kas Presidente ti Estados Unidos.
Inbatad ni Trump, uppat kadagiti babbai ket insigida a waya-wayaan idinto a dagiti uppat a dadduma pay ket maibalud iti maysa a bulan.
Inawaganna daytoy a “Very good news” ken inpettengna a gapu daytoy iti pannakisaritana isut gapuna a saan a natuloy ti plano a panangbitay.
Nupay kasta, naglikudan dagiti otoridad iti Iran ti rakurak ni Trump.
Segun iti Iranian judiciary news agency a Mizan News Agency, awan ti naikeddeng a plano a panangbitay kadagiti nasao a babbai ken kunada nga aramid laeng daytoy ti Amerika.
Inpaganetget ti Iran, us-usaren laeng ni Trump ti isyu tapno agpasindayag ken iyadayo ti atension manipud kadagiti banag maipapan iti gubat ken tension iti rehion pakairamanan ti isyu iti Strait of Hormuz.
Basar iti Iran, adda ti sumagmamano a bilang dagiti babbai a naarestar ti nawaya-wayaanen idinto a dagiti dadduma ket sumangsango iti kaso a mabalin nga agresulta iti pannakaibalud ngem saan nga iti dusa a patay.
Awan pay ti opisial a rakurak manipud iti White House ken Iranian Foreign Ministry mainaig iti isyu.
