LAOAG CITY – Maysa a grupo a nagpabigbig a “former loyalists” ni Presidente Ferdinand Marcos Jr. ken ti amana ti nangipakita ti suporta para iti posible a panagkadua da Vice President Sara Duterte ken ni dati nga Ilocos Sur Governor Chavit Singson inton 2028 national elections.
Iti maysa a press conference, inbatad ti maibilang a Sara-Chavit 2028 Nationwide Movement nga insigida a nagkaykaysada kalpasan ti anunsio ni Vice President Sara a tumaray isuna para iti Presidente inton 2028.
Segun iti grupo, mamati isuda a kabaelan ni Duterte nga itugot ti padasna kas dati a Mayor ti Davao City iti nalawlawa a panangidaulo iti nailian a tukad partikular iti maipapan ti ekonomia, kinakappia, kinaurnos ken panagdur-as.
Insingasing ti grupo a posible a ka-tandem ni Duterte para iti Bise Presidente ket ni Singson nga addaan ti kabaelan ken padas iti serbisio publiko basar iti panangidaulona idiay Ilocos Sur.
Nupay kasta, inadmitir ti grupo a saan pay a pormal a napagsasaritaan ti endorsement ken ni Singson ken awan pay ti direkta a komunikasion kenkuana mainaig iti nasao a plano.
Immunan nga inrakurak ni Vice President Sara nga addan ti napilina a running mate ngem saanna pay laeng nga ibutaktak tapno maprotektaran iti pulitika.
