LAOAG CITY – Nagballaag ti maysa a nangato nga opisial ti Ukraine iti gobierno ti Pilipinas iti panaggatang ti krudo iti Russia a maipagarup a direkta a mangituntunda iti gubat ti Moscow kontra iti Kyiv.
Inbatad ni Deputy Foreign Minister Olexandr Mischenko iti panagbisita daytoy iti pagilian a ti panaggatang ti langis iti Russia ket mangipasimudaag a supsuplayan ti kalaban.
Nadakamat a ti panagbisita ti opisial ket addaan ti gagem a papigsaen ti panagtitinnulong iti negosio ken depensa iti nagbaetan ti Kyiv ken Manila.
Kunana a maawatanna ti rason ti gobierno ti Pilipinas a ti panagngato ti presio ti gasolina gubuay ti gubat iti Middle East ken kasapulan ti alternatibo a suplay isut gapuna nga inallukoyna nga i-minimize ti panagangkat iti Russian energy ken agbirok ti sabali a pagalaan.
Ti Pilipinas ket addaan ti agingga inton Mayo 16 a makagatang ti Russian crude kagiddan ti pannakaiyalud-od ti waiver manipud iti Washington.
Naammoan a temporario a pinalukayan ni United States President Donald Trump ti panangpaiget iti panaglako ti langis ti Russia tapno patibkeren ti suplay.
