LAOAG CITY – Naituding a patibkeren intono bigat, Lunes, Mayo 4 to House Committee on Justice ti report a mangirekomendar ti Articles of Impeachment iti Senado kontra ken ni Vice President Sara Duterte.
Segun ken ni House Justice Committee chair ken Batangas 2nd District Rep. Gerville Luistro, nalpasen ti komite ti panangtingiting no adda ti probable cause dagiti ebidensya a naipasango kadakuada.
Rimuar iti panagdengngeg ti sumagmamano a nadadagsen nga alegasyon, karaman ti maipagarop a saan nga umiso a pannakausar ti P612.5 million a confidential funds, no sadinno a P125 million ti maipagarop a nagastos iti uneg laeng ti 24 nga oras.
Dinillaw pay ti House Committee on Good Government and Public Accountability ti “envelope system” ken maipagarop a mapagduduwaan a resibo.
Iti met sabali a forensic analysis ti National Bureau of Investigation (NBI), rimuar ti maipagarop a pannakapeke dagiti pirma.
Basar met iti Philippine Statistics Authority (PSA), naestablisar dagiti peke a nagan dagiti recipient, idinto a kinumpirmaran ti Commission on Audit (COA) ti disallowance nga umab-abot iti nasurok a P73 million.
Maysa pay kadagiti isyu a natratar ket ti maipagarop a panaglobo ti kinabaknang ni Vice President Duterte o sadinno a basar iti Ombudsman, adda ti P88 million ti net worth ti bise presidente idi 2024.
Nupay kasta, kuna ti Anti-Money Laundering Council (AMLC) nga adda ti naduktalan da a mapagduduwaan a transaksyon nga umabot iti P6.7 billion a maipagarop a nakairamanan ni Vice President Duterte ken ti asawa na a ni Atty. Manases Carpio.
Karaman pay kadagiti akusasyon iti bise presidente ket ti maipagarop a “kill threat” kontra kada Presidente Ferdinand Marcos Jr., First Lady Liza Araneta-Marcos, ken dati nga Speaker Ferdinand Martin Romualdez.
