LAOAG CITY – Inanunsio ni United States President Donald Trump ti tallo nga aldaw a ceasefire iti nagbaetan ti Russia ken Ukraine manipud Mayo 9 agingga Mayo 11 kas pananglagip iti panaglippas ti maikadua a gubat sangalubongan para iti Russia.
Iti post-na iti Truth Social, inbatad ni Trump a karaman iti ceasefire ti temporario a panagsardeng ti amin nga opensiba militar ken panagsinnukat ti sag-1,000 a balud manipud iti tunggal pagilian.
Immunan nga inrakurak ni Trump nga adda ti maiwaywayat a panagsinnarita para iti temporary ceasefire kalpasan ti pannakisaritana ken ni Russian President Vladimir Putin idi Abril 29.
Kagiddan iti daytoy, nangideklarar met ti Russia ti bukud a ceasefire manipud Mayo 8 agingga Mayo 9 kas paset ti pananglagip daytoy iti balligi ti Soviet Union kontra iti Nazi Germany idi World War II.
Kabayatanna, insingasing ti Ukraine ti open-ended ceasefire a nangrugi idi Martes ken nagpanawagan iti Russia nga agtungpal iti nasao nga addang.
